Gisaulog kagahapong adlawa ang ika-40 nga anibersaryo sa makasaysayanong EDSA People Power Revolution pinaagi sa paghinumdom sa pagkapukan sa diktadurang rehimeng Marcos Sr. niadtong 1986, diin kolektibong pagbangon ug pagprotesta sa katawhan ang nakapahimutang sa demokrasya sa Pilipinas.
Sumala ni Atty. Sonny Matula, Chairperson sa Nagkaisa Labor Coalition, nga bisan natangtang na ang diktador nga si anhing kanhi President Ferdinand Marcos Sr., wala gihapon mabag-o ang kahimtang sa kadaghanan sa mga mamumuo ug katawhan tungod sa padayon nga kakulang sa hustisyang panlipunan, kasiguraduhan sa trabaho, ug katungod sa mga trabahante nga mag-organisa ug union.
Gipunting usab ni Matula, nga ang kapubrihon ug kakulang sa edukasyon resulta sa pagkonsentra sa gahum ug bahandi sa pipila ka political dynasty kansa nagkontrolar sa gobyerno, gani gikinahanglan matud pa nga pugngan ang dinastiya sa politika aron matinuod ang demokrasya ug katarungan alang sa tanan. Dugang pa ni Matula, nga kinahanglang i-prohibit na ang ilang gi-propose ngadto sa 4th degree, consanguinity ug affinity ug ingon man ang marital relation sama sa legal spouse.
Saigon pa niini, nga gihingusgan usab nila ang pagpanobag sa mga opisyal nga naghurot sa pundo sa katawhan ug nang-abuso sa bahandi, hilabi na ang natigayong halapad nga korapsyon sa flood control projects sa Department of Public Works and Highways kon DPWH ug sa ubang ahensya sa panggamhanan.
Gani, subay sa maong kalihokan gihisgutan usab matud pa sa grupo ni Matula ang accountability o pagpanubag sa gihimong krimen against humanity sa War on Drugs Campaign ni Kanhi Pangulong Rodrigo Roa Duterte.
