BUTUAN CITY – Nakahiagum na usab ang Los Angeles Lakers og dakong kadaut tungod sa injury kagahapong adlawa human gikompirma nga ang ilang star guard nga si Austin Reaves dili na makadula sa nahibiling bahin sa regular season tungod sa muscle injury.
Nasayran nga ang Lakers wala pa gihapon naka-recover sa balita niadtong Biyernes nga si Luka Doncic dili usab makadula sa nahibiling regular season tungod sa hamstring strain, nga gisundan sa usa ka pamahayag nga si Reaves dili na moduwa hangtod sa postseason.
Wala pa gihatag nga eksaktong adlaw kung kanus-a posible makabalik si Reaves.
Kini nga balita usa na usab ka dakong hampak sa paglaum sa Lakers nga makigkompetensya og seryoso alang sa titulo sa NBA sa panahon sa playoffs.
Si Reaves ug si Doncic importante kaayo nga mga players sa pagbangon sa Lakers niadtong Marso, diin nidaog ang team og 15 sa 17 ka duwa ug nisaka sa ikatulong pwesto sa Western Conference standings.
Apan, ang kusog nga momentum sa Lakers napugngan human sa grabe nga kapildihan nga 139-96 batok sa defending champion nga Oklahoma City Thunder niadtong Huwebes, diin duha sa ilang pinakadakong offensive stars — si Doncic ug si Reaves — nakaangkon og mga injury nga makapahunong sa ilang pagdula sa regular season.
Ang Lakers nga dunay 50 ka daug og 27 ka pildi, adunay lima pa ka duwa nga nahibilin sa regular season, nga sugdan sa dula batok sa Dallas Mavericks.
