BUTUAN CITY – Giklaro ni Marko Davey Reyes, tigpamaba sa Department of Social Welfare and Development kon DSWD-Caraga nga nag-una sila sa timeline sa pagpang-apod apod sa 500-pisos kada-bulan nga Social Pension Program alang sa mga senior citizens. Kini isip tubag sa reklamo sa pipila ka mga senior citizens kalabot sa langay matud pa nga payout niini.
Sa eksklusibong pakighinabi sa Bombo Radyo Butuan, gipadayag ni Reyes nga gani ning bulan sa Hunyo, halos 90-porsiento na nilang nakab-ot ang dul-an sa 184-mil sa target nilang indigent senior citizens nga marelisan sa ilang social pension alang sa unang semestre ning tuiga.
Bugtong tutukan na lang nila sa payout sa unang semana ning bulana, mao ang dakbayan sa Butuan rason nga sa ikaduhang semana, seguradong ila na kining matapos.
