BUTUAN CITY – Miresulta sa kamatayon sa usa ka senior citizen ang ngil-ngig nga disgrasya nga natigayon kaganinang alas 12:10 sa sayung buntag sa may P-2 Brgy. Antongalon, Butuan City. Naila ang biktima nga si Dominador A. Rosales Sr., 64-anyos, menyu og residente sa Purok-3, Brgy. Antongalon, Butuan City.
Sigon ni Police Corporal Jerome Binlones, imbestigador sa Butuan City Police Station-4, nga gikan sa diskuhan ang biktima nga langu sa ilimnong makahubog sa dihang mitabok sa kalsada og nadasmagan sa usa ka wing van nga gimanehoan ni Arjay Carlos Antonio, 38-anyos, residente sa Imurong Baggao, Cagayan kauban si Eric Lorenzo Batang, 41-anyos, menyu nga taga Cagayan Valley.
Nasayran nga gikan sa Davao City ang maong wing van nga padulong unta sa Nueva Ecija. Nakahiagum ug dili tiaw nga mga samad sa kalawasan lakip nasa ulo ang biktima hinungdan sa hinanaling kamatayon.
Gikustudiya na sa Butuan City Police Station-4 ang nalambigit nga sakyanan lakip na ang sakay niini alang sa tukmang disposasyon samtang nagka-areglo usab ang pamilya sa biktima.
