BUTUAN CITY – Gikumpirma sa Office of the Ombudsman ang rekomendasyon sa Department of Justice (DOJ) nga pasakahan og kasong plunder si Senator Jinggoy Estrada ug uban pang opisyal may kalabutan sa anomaliya sa kontrobersyal nga flood control projects.
Sigon ni Assistant Ombudsman Mico Clavano, lakip si Estrada sa mga “primary respondents” nga nakalatid sa resolusyon sa DOJ.
Kauban usab sa listahan sa DOJ si kanhe Department of Public Works and Highways Secretary Manny Bonoan.
Mibalibad na nga mokomento si Estrada mahitungod sa plunder case diin sa iyang abogado nalang matud pa makig-estorya.
Mahinumdumang gawas kang Estrada, una na usab nga gipahayag sa Ombudsman ang kasong giandam batuk kang Sen. Chiz Escudero ug kanhe House Speaker nga si Leyte 1st District Rep. Martin Romualdez.
Sa mga kasamtangan ug kanhe senador, si kanhe Sen. Bong Revilla lang ang naaresto mahitungod sa matud pa anomaliya sa flood control projects.
