BUTUAN CITY – Hingpit nang gipasakaan og kasong plunder sa Ombudsman si Senador Rodante Marcoleta tungod sa wala niya paggdeklara sa ₱75 milyon nga campaign donations nga nadawat niya niadtong 2025 campaign period.
Gisang-at kini sa Sandiganbayan ug apil usab sa kaso ang mga donors nga sila kanhi Congressman Mike Defensor ug mga negosyante nga sila Aristotle Viray ug Joseph Espiritu.
Sumala sa Ombudsman, wala gi-apil ni Marcoleta ang maong kantidad sa iyang Statement of Assets, Liabilities and Networth kon SALN ug sa Statement of Contribution and Expenditure kon SOCE.
Nasayrang milapas kini sa ₱50 milyon nga threshold sa kasong plunder ubos sa Republic Act 7080. Sa iyang counter-affidavit, gi-angkon ni Marcoleta nga nadawat niya ang donasyon dayong pasabot nga gikan matud pa kini sa mga pribadong higala ug nagamit na sa kampanya sa wala pa siya nakapasa sa iyang SALN.
Gipasaka ang kaso human ang tulo ka adlaw nga rally sa mga miyembro sa Iglesia ni Cristo nga nagtumong pagpakita sa ilang suporta ngadto sa senador, diin misalmot usab sila Senadora Imee Marcos ug dating kongresista Mike Defensor.
Ang kaso susihon pa sa Sandiganbayan, ug karon pa lang, gipadayag na sa Criminal Investigation and Detection Group kon CIDG nga andam na ipatuman ang warrant of arrest kung ipagawas kini sa korte.
