BUTUAN CITY – Gipadayag ni Senador Risa Hontiveros nga seryoso gihapon niyang gihunahuna ang posibileng pagdagan pagka-presidente sa 2028 presidential elections, samtang naghulat pa sa desisyon sa iyang han-ay ug mga kaalyado nga grupo.
Sigon ni Hontiveros, andam siyang modagan kung siya ang mapili nga kandidato sa United Opposition.
Nagpasalamat ang senador sa mga bag-ong inisyatiba sa Akbayan Partylist ug uban pang grupo nga naglusad sa programa nga adunay tema nga “Risa Na!” isip pagpakita sa suporta sa iyang posibleng kandidatura.
Sumala ni Hontiveros, importante nga makapili ang ilang han-ay ug kandidato nga gi-isip nga pinakakusog ug pinaka-angay nga pambato sa eleksyon.
Mala-umon ang senadora, nga maghi-usa ang ilang grupo sa dili pa matapos ang 2026 o sa unang bahin sa 2027 aron matino kung kinsa ang mahimong standard bearer.
Madumdomang una nang gi-anunsyo si Vice President Sara Duterte niadtong Pebrero 18, sa iyang tinguha nga modagan isip Presidente sa 2028 elections.
