BUTUAN CITY – Nagduso og reklamong graft ang usa ka grupo sa “concerned Department of Health personnel” sa Office of the Ombudsman batok kang Health Sec Ted Herbosa ug 16 pa ka opisyal tungod sa pagwaldas matud pa sa ₱1.4 bilyon nga kantidad sa mga tambal ug bakuna.
Sa 33 ka palid nga reklamo, gi-akusahan ang kalihim ug uban pang opisyal og graft, serious dishonesty, grave misconduct, ug conduct prejudicial to public service tungod sa kapakyas sa pag-apod-apod sa mga tambal sama sa HIV antiretrovirals, psychiatric medications, ug vaccines nga giingong napaso lang sa mga bodega.
Sumala sa grupo, mi-expire ang ₱68 milyon nga kantidad sa medisina lakip ang 1.2 milyon ka cycles sa family planning drugs ug psychiatric injectables, ₱1.3 bilyon nga bakuna nga wala ma-deliver, ug 1.6 milyon ka tablets sa HIV antiretrovirals kansa usa ka “dereliction of duty” kon pagpasagad sa katungdanan ug diretsong paglapas sa pagsalig sa publiko.
Matud pa sa mga complainants, nahibalo nang daan ang mga opisyal bahin sa overstocking ug sa mga tambal nga hapit na mu-expire pinaagi sa usa ka executive briefer nga naglakip og listahan sa mga commodities apan imbes ipatuman ang emergency distribution plan, gi-una na hinuon matud pa sa Department of Health ang pagdali sa disposal sa mga tambal aron ma-liquidate ang stock ug matago ang ebidensya gikan sa media scrutiny.
Tungod niini, gihangyo sa grupo ang Office of the Ombudsman nga ipailalom dayon sa preventive suspension si Ted Herbosa ug ang iyang mga kauban aron malikayan ang posibleng pagpanghadlok sa mga testigo o paghilabot sa ebidensya samtang nagpadayon ang imbestigasyon
