BUTUAN CITY – Dako ang pagpasalamat ni Dr. Gewaresel Carlos, ang principal sa Ampayon National High School sa Brgy. Ampayon ning siyudad sa Butuan ngadto sa ilang mga stakeholders sa kanunay nga pagsuporta kanila hinungdan sa malampusong pagbukas nila kaganina sa school year 2022-20233.
Sa eksklusibong pakighinabi sa Bombo Radyo Butuan, aminado si Dr. Carlos nga dili perpekto ang ilang kalihukan apan malipayon sila tungod kay gipaningkamutan nilang tanan nga mahimo kining almost perfect alang sa ilang mga magtutungha.
Mi-abot matud pa sa 41 ang ilang mga magtutudlo alang sa junior ug senior high aron maoy magtinabangay pagtudlo sa 930 nila ka mga na-enrol as of kaganinang buntag, ang susamang ihap sa mga enrolees ning mi-aging school year.
Tungod sa kadaghan na sa ilang mga magtutungha sa Grade 12, nag-undang na sila pagdawat og mga enrolees tungod kay ila na mang nakab-ot ang 50 ka mga magtutungha sa matag-classroom nga maoy ilang target gawas lamang sa mga junior high schools nga maoy padayon nilang ginadawat.
Aminado ang opisyal nga duna pa sila’y kulang sa ilang mga facilities ilabina sa mga lawak-tunghaan nga gipasamot sa gibuksan nilang mga bag-ong programs apan gipangitaan nila og paagi ang tanan.
