BUTUAN CITY – Gi-angkon sa Chinese state media nga gitanom sa China Coast Guard (CCG) ang bandila sa China sa Sandy Cay kon mas nailang Pag-asa Cay 2 sa may Spratly Islands ug gideklara ang maong lugar isip “sovereign jurisdiction.”
Nahitabo kini sa tunga-tunga pa nga bahin ning bulan sa Abril, dihang mihimo og inspeksyon ang mga personahe sa CCG ug pagpanglimpyo sa maong reef.
Gikumperma usab sa Armed Forces of the Philippines (AFP) nga magpagawas na og opisyal nga pamahayag ang National Task Force for the West Philippine Sea (NTF-WPS) mahitungod sa maong insidente.
Nasayrang duol ra ang Sandy Cay sa Pag-asa Island sa West Philippine Sea (WPS), kondiin nakabase ang mga sundalong Pilipino ingon man ang usa ka gamay’ng komunidad.
Kahinumdumang gi-akusahan sa Philippine Coast Guard ang CCG ingon man ang Chinese Navy og pagpang-bully niadtong Enero sa mga sakyanang pandagat sa Bureau of Fisheries and Aquatic Resources (BFAR) nga padulong unta sa Sandy Cay alang sa marine survey, human nga ninggawas ang mga balita nga duna matud pay gipangbu-bo nga mga dugmok nga corals sa maong dapit.
