BUTUAN CITY – Gipahayag ni San Juan Rep. Ysabel Maria Zamora nga mas nidaghan ang ebidensya nga gilakip sa impeachment complaint batok kang Vice President Sara Duterte karon kumpara sa miaging tuig, samtang gisusi kini sa House Committee on Justice aron matino kung adunay probable cause.
Sumala ni Zamora, nadugangan ang mga dokumento ug attachments sa reklamo, bisan pa man nga halos pareho ra gihapon ang mga alegasyon nga impeachable offenses.
Gibutyag usab niini nga adunay igo nga basehan ang kaso ug dili lang kini buhat-buhat..
Giangkon usab nga adunay sagol pulitika ang proseso, labi na nga nagkaduol ang eleksyon, apan matod sumala niini nakita sa mga magbabalaod nga adunay tinuod nga rason ang reklamo.
Posible nga sakop sa impeachment proceedings ang exemption sa bank secrecy law, bisan pa nga dili pa kini klaro kaayo sa balaod.
Gibarugan ni Zamora nga ang mga reklamo giagi og maayong pagrepaso ug napamatud-an nga “sufficient in form and substance,” tungod kay kompleto ang mga detalye ug ang giingong mga buhat sa respondent.
Giklaro usab nga sa karon nga punto, dili pa kinahanglan ang aktwal nga ebidensya, kundili ang klaro nga paglatid sa mga akusasyon.
Posible usab nga motambong si Duterte sa mosunod nga mga pagdungog pinaagi sa iyang abogado, subay sa due process.
