BUTUAN CITY – Human ang pila ka buwang pagpakahilom, nagpagawas na og video statement si kanhi House Speaker Martin Romualdez aron ipadayag ang dagan sa pagpatuman sa mga proyekto nga maoy tinubdan sa lapad nga kurapsyon karon sa gobyerno.
Sa makakurat nga pamahayag, gipadayag ni Romualdez nga tungod sa pag-abuso matud pa sa iyang pagpakahilom kalabot sa kayagaw nga mugna sa lapad nga kurapsyon, iyang atubangon head-on, ang maong kontrobersiya tungod kay dili siya musugot nga himuon siyang scapegoat aron lang makalingkawas ang tawong mao matud pa’y tinuod nga utok niini ug dili kay siya.
Gipasabot sa kanhi house speaker nga ang iyang pagpakahilom gituyo isip respeto matud pa sa legal process sa nasud gawas nga dili usab niya gustong makadugang sa daan nang nagkatibulaag nga isyu.
Nagbahad kining dili na magpakahilom tungod kay kinahanglang masayran sa katawhang Filipino ang kamatu-uran.
Nanghunaw usab kini sa akusasyong siya ang mastermind sa kurapsyon dungan sa pagbutyag nga ang House of Representatives nga iyang gidumala kaniadto, parte lang sa mga sanga sa gobyerno.
Giklaro usab niini nga ang national budget nga maoy gihubsan sa lapad nga kurapsyon, wala maggikan sa Kamara kondili gikan matud pa sa executive branch sa gobyerno nga bisan wala niya panganli, apan kini gidumala sa iyang ig-agaw nga si Pangulong Ferdinand Marcos Jr.
Gi-usa usa pa niini pag-mention nga ang nasundong pundo dili lang binuhatan sa usa ka tawo o kaha chamber kondili produkto sa constitutional chain nga gilangkuban sa Kamara, Senado, ug sa ehekutibo.
