BUTUAN CITY – Gitaho sa Department of Energy (DOE) nga gilauman nang makabaton og rollback sa presyo sa diesel ug kerosene sa sunod semana samtang posibleng motaas usab ang presyo sa gasolina.
Base sa upat ka adlaw nga trading monitoring sa Mean of Platts Singapore, gibana-banang mokunhod sa kapin 9 pesos kada litro ang diesel, ug 12 pesos kada litro usab sa kerosene.
Samtang posibleng motaas usab og P1.60 hangtud sa P1.70 kada litro ang gasolina.
Sumala ni DOE Oil Industry Management Bureau Director Rino Abad, inanay nang mibalik sa normal market-based pricing ang lana human maapektuhan sa tensyon sa Middle East nga nagsugod niadtong Pebrero.
Ang presyo sa lana sa pangkalibutanong merkado kasamtangang anaa sa kapin 70 dolyares hangtud sa 95 dolyares kada bariles, nga alisdan sa normal nga presyo niining 55 dolyares hangtud 65 dolyares kada bariles.
Ianunsiyo usab sa mga kumpaniya sa lana ang opisyal nga presyo sa mga produktong petrolyo sa Lunes ug ipatuman usab sa adlaw’ng Martes.
