BUTUAN CITY – Padayon pa ang imbestigasyon sa kapulisan sa Prosperidad, Agusan del Sur aron matumbok ang responsable ug ang motibo sa pagpamusil-patay pasado alas-sais kagabii sa may Purok 6, Brgy. Poblacion.
Naila ang biktimang si Albert Escleto, 56-anyos, residente sa Purok 5, Brgy. San Vicente, sakop sa maong lungsod ug usa ka retiradong mechanical engineer sa Kingdom of Saudi Arabia.
Sa eksklusibong pakighinabi sa Bombol Radyo Butuan, gibutyag ni Patrolman Mel Jefford Sultan, handling investigator sa Prosperidad Municipal Police Station, gikan matud pa nagkaon ang biktima ka-uban ang iyang mga batchmates ug dihang pasulod na sa iyang sakyanan aron mupa-uli na, dinhi na siya giduol sa duha ka wala mailang responsable dayong pusil sa nagkada-iyang parte sa iyang lawas.
Mi-abot sa onse ka mga samad-pinusilan ang na-angkon sa biktima samtang ang nakuhang mga basiyo sa armas sa mismong crime scene, ila nang gisubmite ngadto sa ilang forensic unit alang sa cross matching.
