BUTUAN CITY – Gipatuman karon sa Department of Education kon DepEd-Butuan City Division ang remote enrollment alang sa school year 2020-2021 isip pagsunod na usab sa health protocols nga gitakda sa Inter-Agency Task Force kon IATF.
Sa eksklusibong pakighinabi sa Bombo Radyo Butuan, gipasabot ni DepEd-Butuan City schools division superintendent Marilou Dedumo nga ubos sa remote enrollment, dili na required ang pagpakita sa i-enrol nga mga learners o kaha sa ilang ginikanan ngadto sa tunghaan.
Kini tungod kay dunaa’y form nga fill-up-pan alang sa pagpa-enrol sa bata kansa ibilin diha sa barangay hall o kaha sa usa ka kiosk sa eskwelahan.
Pwede ra matud pang kontakon na lang sa mga magtutudlo ang contact number sa bata o kaha ilang gilnikanan aron masayran kung duna ba sila’y digital gadget sama sa laptop ug internet connection ingon man ang klase sa modality nga pilion alang sa mga learners.
Giklaro usab sa opisyal nga wala na’y face-to-face learning nga matigayon sa pagbukas sa klase klarong Agusto 24 hinungdan nga ang kapili-an lang sa mga learners mao ang modular learning kondiin hatagan sila og modules kon activity sheets aron didto na kini himuon sa ilang balay uban sa mga facilitators nga mga kabanay ra usab sa mga bata.
Anaa usab ang blended online learning nga sagol online ug modular uban sa limitado pang radio-based instruction.
