BUTUAN CITY – Gikasubo ni Surigao Del Norte 2nd District Representative Robert Ace Barbers ang lakang nga gihimo sa Sanguniang Panlalawigan nga nagdeklarang persona-non-grata kang Land Transportation Franchising and Regulatory Board kon LTFRB-Caraga Officer-in-charge (OIC) regional director Ma. Kristina Cassion.
Nagsugod ang deklarasyon dihang nag-post sa social media sa ilang nasinatian ang pipila ka mga personahe sa maong buhatan ug mga bus drivers nga maoy misundo sa 600 ka mga estudyanteng pila ka semana nang stranded sa Mindanao State University (MSU) sa Marawi City ug Iligan City apil niini ang kapin sa 100 nga mga Surigaonons tungod sa COVID-19 pandemic.
Sa maong panahon wala gituman sa mga opisyal sa Surigao City ang nasabutang sila ang mu-abaga sa ilang panihapon apan bugtong ang mga estudyante lang ang gipakaon sa mga sakop sa City Disaster Risk Reduction and Management Office (CDRRMO) kinsa nasuko pa dihang nanaog na ang mga nagsundo sa rasong basin matud pa og matakdan sila tungod sa 3 kaso sa COVID-19 nga natala sa Butuan City.
Tungod kay gipasa-pasa na ngadto ni bisan kinsang mga tawo dili nila ka-ila, nagdesisyon na lang ang mga nagsundo nga mupa-uli na lang sa Butuan City sa dies-oras sa gabii bisan og gutom na kaayo nga maoy hinungdan aron mag-post sa ilang nasinatian nga mao usa’y gihimo ni Cassion.
Sa eksklusibong interview sa Bombo Radyo Butuan, gipadayag sa kongresista mabaw ka kaayo ang rason sa maong deklarasyon ilabina nga nagpadayag lang sa ilang sentimiento ang opisyal nga mao usa’y gihimo sa mga estudyante kansa mi-ani pa og suporta gikan sa mga netizens dayong kondena sa mga Surigao City officials.
Dismayado ang kongresista sa deklarasyon sa mga opisyal sa iyang lalawigan dungan sa pagpadayag nga posibleng duna’y taas nga opisyal nga maioyi nagtudlo kanilang magpapasar og resolusyon alang sa maong deklarasyon.
