BUTUAN CITY – Gibulgar sa usa ka affidavit sa oiniriso nga si Ramil Madriaga, nga nag-ilang bagman matud pa ni Vice President Sara Duterte, ang matud pa plano sa pagpahawa kang Pangulong Ferdinand Marcos Jr. kung dili siya mobiya sa puwesto pag-abot sa 2025.
Sa iyang supplemental affidavit nga gisubmite sa House justice panel karung Martes, Abril 14, giakusahan ni Madriaga si Kanhe Pangulong Rodrigo Duterte nga matud pa nagplano og mga lakang sama sa kudeta o bisan asasinasyon, lakip ang civil disobedience, mass resignation sa mga opisyal, ug posible nga armadong pag-atake sa Malacañang.
Sumala pa niini nga adunay kasabutan matud pa nga namugna niadtong 2021 tali sa kampo nila Marcos ug Duterte nga mobiya sa puwesto ang Pangulo sa 2025 aron hatagan og dalan ang pagkapresidente ni Sara Duterte.
Kung dili kini matuman, gihisgutan ang nagkalain-laing pamaagi aron mapahawa ang Pangulo, lakip ang pagsabotahe sa administrasyon ug pagduso og impeachment case gamit ang isyu sa korapsyon.
Midugang usab si Madriaga nga ang tumong matud pa sa plano mao ang pagpamubo sa termino ni Marcos aron mahimong kwalipikado si Sara Duterte nga modagan pagka-presidente sa 2028.
Iyang gibutyag usab ang matud pa pagpondo sa grupong ISIP Pilipinas alang sa kampanya ni Sara Duterte niadtong 2022, lakip ang 175 milyon pesos nga iyang nadawat matud pa gikan sa usa ka turnover sa Quezon City, nga gigamit sa campaign operations sa nagkalain-laing bahin sa nasud.
Sa pagkakaron, wala pa’y opisyal nga pahayag gikan sa mga kampo sa mga nalambigit bahin sa maong mga alegasyon.
