BUTUAN CITY – Hugot nga gipahimangnuan ni Police Regional Office kon PRO-13 director BGen. Romeo Caramat Jr. ang tanang mga chiefs of police nga bantayan ang ilang tagsa-tagsa ka area of responsibility aron masigurong malikayan ang mga makonsiderang super-spreader events.
Sa eksklusibong pakighinabi sa Bombo Radyo Philippines, gipadayag ni PRO-13 information officer PMajor Dorothy Tumulak, kinahanglang obserbahan sa tanan ang mga health protocols aron masigurong wala’y matigayong tinakdanay.
Human matud pa gipagawas ni PNP Chief Director General Guillermo Eleazar nga silutan niya ang nagpasagad nga mga chiefs of police, daling nakig-zoom meeting si Director Eleazar ngadto sa tanan niyang mga police chiefs aron personal nga maka-abot kini nga bahad ngadto kanila ug sa ilang mga sakop.
Gimanduan usab ang maong mga police chiefs nga makig-alayon sa mga local government units aron masigurong istrikto kining mapatuman sa lugar nga ilang gi-alagaran.
Mupa-ilalom usab sa pre-charge investigation ang mga hepe sa kapulisan nga masapong wala makabadlong sa mga tawo sa ilang AOR nga nakalapas sa mga health protocols aron mahatagan og due process.
Kini ilabina nga kinahanglang makig-alayon ang mga chiefs of policesa mga local chief executives alang sa hugot nga pagpatuman sa mga health protocols.
Giklaro usab ni Major Tumulak nga apil sa manubag sa masapong kalapasan ang mga barangay kapitan.
Nanawagan usab siya sa tanan nga tabangan sila tungod kay dili mulampos ang tinguha sa ilang chief PNP kung wala’y pag-abag sa katawhan.
