BUTUAN CITY – Nagpadayon karon ang pre-registration sa Department of Education kon DepEd-Caraga alang sa school year 2021-2022 human kini gisugdan niadtong Biernes, Marso 25 nga mulungtad sa Abril 30.
Ipa-ilalom niini kadtong mga incoming kindergarten, grades 1, 7, ug 11 learners sa tanang mga pampublikong elementarya ug sekondaryang tunghaan sa ingon matugutan na ang ahensya pag-andam alang sa umalabot nga school year.
Sa eksklusibong pakighinabi sa Bombo Radyo Butuan, gipadayag ni DepEd-Caraga spokesperson Pedro Tecson nga dugay na kining gipangandaman sa mga magtutudlo tungod kay tinuig man kining ginahimo, adiser magsugod ug adiser usab matapos ang school year.
Base sa ilang nasinatian ning mi-aging mga katu-igan, gipadayag ni Tecson nga maayo ang response sa mga ginikanan niini rason nga ila usab nga napangandaman og maayo ang nakalabay nga mga school years bisan pa man ning nakalabay nga duha ka tuig diin na-igo sa COVID-19 pandemic ang nasud tungod kay duna’y mga paagi nga gihimo ang ahensya.
Karon nga nag-anam na kalu-ag ang community restrictions kondiin sa Caraga Region, ang dakbayan pa sa Butuan ang anaa sa level 1, gipa-andam na sa ahensya ang uban pang mga tunghaan aron maka-apil usab sila sa face-to-face classes.
Hinuon aminado ang opisyal nga pinili lang gihapon ang mga tunghaang mupa-ilalom niini tungod kay gitugut man kini sa mga lugar ilalom sa level 1 ug 2 classifications.
Gidugang sa opisyal, wala matud pa’y angayang kabalak-an sa mga sumbanan sama sa pagsunod sa health protocols ug uban pang kagamitan sulod sa lawak-tunghaan tungod kay magamit na dinhi ang Maintenance and Other Operating Expenses kon MOOE nga dili na manghasol pa sa mga ginikanan gawas lang ug dinalian ang kinahanglanon sulod sa classroom.
Nasayrang ang mga estudyante sa ubang mga grade levels, mga pre-registered na hinungdan nga dili na sila apil niini.
