BUTUAN CITY – Gisaksihan ni Philippine National Police kon PNP Chief Director General Benjamin Acorda Jr., ang presentasyon sa 19 ka mga kanhi sakop sa Communist Party of the Philippines-New People’s Army kon CPP-NPA nga mitahan sa nagkada-iyang police units sa Caraga Region.
Siya usab ang nanguna sa demilitarisasyon kon pagguba sa nagkada-iyang klase sa armas nga narekober sa kapulisan ning rehiyon gikan sa nasangpit nga mga rebeldeng nanurender.
Sa eksklusibong pakighinabi sa Bombo Radyo Butuan, gibutyag ni Police Major Jennifer Ometer, tigpamaba sa Police Regional Office kon PRO-13, nga gawas sa 19 ka mga kanhi rebelde nga gitawag na nila karon og friends rescued, duna pa’y laing kapin sa usa ka gatus nga giproseso na usab gikan sa Agusan del Sur.
Samtang mi-abot sa 178 ka nagkada-iyang klase sa armas ang ilang gi-turn over ngadto sa PNP chief kansa apil sa gisurender sa nasangpit nga mga ‘friends rescued’.
Samtang aron mabati sa mga friends rescued ang diwa sa Pasko, gihatagan sila sa taga-Department of Social Welfare and Development kon DSWD-Caraga og mga food packs isip dugang suporta sa kagamhanan ngadto sa ilang pagbalik sa pagpakabuhi diha sa komunidad.
Subay niini, mala-umon ang Police Regional Office-13 pagpanguna ni regional director PBGen. Kirby John Kraft nga daghan pa ang musunod niini ilabina kadtong mga kabanay sa nanurender sa ingon dili na sila magtago-tago sa balaud ug maka-uban na nila kanunay ang ilang pamilya.
