BUTUAN CITY – Nagkaguliyang ang mga estudyante ug mga magtutudlo sa Lumbocan National High School sa Brgy. Lumbocan ning siyudad sa Butuan human nga tulo ka mga babayeng estudyante ang gitu-uhang nasudlan matud pa sa dautang espiritu kaganinang buntag.
Sa eksklusibong pakighinabi sa Bombo Radyo Butuan, gipadayag ni school principal Rachelle Rendon nga ang maong mga estudyante gilangkuban sa duha ka estudyante sa grade 7 samtang usa sa grade 10 nga parehong gidala sa ilang school clinic diin didto sila gi-atiman.
Dali matud pang gipatawag ang ilang mga ginikanan kondiin ang ginikanan sa usa ka estudyante nagdesisyon nga patambalan og binisaya ang iyang anak sa Brgy. Taligaman ning siyudad.
Giklaro ni Rendon nga kini na ang ikanapulo nga kaso nga natala sa ilang tunghaan sukad niadtong Enero ug gitu-uhan niyang tungod kini sa heat exhaustion dala sa grabeng ka-init sa panahon.
Dugangan pa nga duna’y ubang mga estudyante nga mangiskwela lang nga wala’y pamahaw ug duna pa’y gihambin nga balatian rason nga dili siya mutuo nga makonsidera kining mass hysteria o kaha nasudlan ba og dautang espiritu dungan sa pagklaro nga girespeto usab niya ang pagtuo sa ubang mga ginikanan.
