BUTUAN CITY- Mingpirma ang gobyerno sa Pilipinas ug Estados Unidos og lima ka tuig nga kasabutan nga naggahin og kinatibuk-ang P42 bilyon aron mapalig-on ang kampanya batok sa Human Immunodeficiency Virus kon HIV ug tuberculosis kon TB sa nasud.
Ubos sa Health Strategic Objective Agreement, mopuhunan ang gobyerno sa Pilipinas og kapin P30 bilyon sa pagpalambo sa sistema sa panglawas, samtang nagtinguha usab ang gobyerno sa Estados Unidos, uban sa koordinasyon sa US Congress, nga maghatag og kapin sa P11.8 bilyon nga suporta.
Tumong sa maong kasabutan ang pagpalig-on sa disease surveillance, mas paspas nga pag-ila ug pagtubag sa mga outbreak, paghiusa sa mga serbisyo sa panglawas, ug pagpalambo sa kapasidad sa Pilipinas sa pagdumala ug pagpondo sa sektor sa panglawas.
Sumala sa US Embassy, gilauman nga kini nga panagtambayayong makatabang sa pagluwas sa kinabuhi sa mga Pilipino ug Amerikano, makapalig-on sa health system sa Pilipinas, ug makapugong sa pagkaylap sa makatakod nga mga sakit sama sa HIV ug TB.
