BUTUAN CITY – Pormal nang nagduso og diplomatic protest ang Department of Foreign Affairs (DFA) batuk sa China kalabot sa “racist depiction” sa mga Pilipino subay sa mga sunod-sunod nga opinion videos ug editorial cartoons nga gimantala sa state-run newspaper nga China Daily.
Nag-ugat kini gikan sa gipagawas nga artificial intelligence kon AI-generated video sa facebook sa China Daily nga nagpakita sa mga Pilipino isip unggoy samtang gibinastos ang arbitral victory sa Pilipinas.
Sigon sa DFA, unang gireklamo ni Foreign Affairs USec. Leo Herrera-Lim ang maong isyu direkta kang Chinese Ambassador Jing Quan sa usa ka tigom kagahapon kondiin iyang gi-demand nga tangtangon ang maong offensive materials.
Gibutyag ni Lim sa Chinese envoy nga sukwahi ang maong content sa gila-umang mutual respect tali sa duha ka nasud ilabina nga wala kini mahatag nga kaayuhan sa ilang bilateral relations. Sigon sa DFA, nagduso sila og diplomatic protest tungod kay milapas na ang China Daily sa lehitimong diskursong politikal ug dayag ang pagpangbastos niini sa mga Pilipino. Misulat na usab ang Philippine Embassy sa Beijing ngadto sa editor-in-chief sa mantalan aron i-delete gilayon ang maong material.
