BUTUAN CITY – Gipasanginlan sa China ang tropa sa Pilipinas nga naka-istasyon sa BRP Sierra Madre og pagpani-on og armas sa China Coast Guard samtang nagpatrolya sa Ayungin shoal niadtong Mayo 19 atol sa gihimong resupply mission sa Pilipinas.
Sa 29 ka segundong video nga gipagawas sa state-run news channel sa China nga CGTN, makita ang duha ka lalaking nakasuot og mask gikan sa gisadsad nga barko sa Pilipinas nga nagkupot og rifle nga nakati-on sa direksiyon sa CCG.
Wala pa’y gipagawas nga komento ang panig sa Philippine Navy, Philippine Coast Guard, National Security Council ug embahada sa Pilipinas sa Beijing kalabot sa authenticity sa maong video.
Ang mga komprontasyon tali sa Pilipinas ug China sa gi-ilugang kadagatan, mas nadugang sukad pa ning mi-aging tuig human ang sunod-sunod nga pagpamomba sa China Coast Guard gamit ang water cannon ug ang pagbangga sa mga sakyanang pandagat sa Pilipinas.
Sa makasaysayanong pagpamulong ni Pangulong Ferdinand Marcos Jr. sa iyang pagtambong sa Asia’s annual premier defense summit sa Singapore, ma-isugong gibatikos sa pangulo ang ilegal, coercive ug agresibong mga aksyon sa China sa disputed waters nga nakaguba sa panglantaw sa mga nasud sa Southeast Asia alang sa kalinaw, istabilidad ug kalambuan sa kadagatan.
Madumdumdang niadtong 1999, gisangad sa may Ayungin shoal ang barkong panggubat sa Pilipinas nga BRP Sierra Madre nga nagsilbing military outpost sa atong nasud aron barugan ang atong soberaniya sa West Philippine Sea.
