BUTUAN CITY – Padayong gipakusgan sa Philippine Coast Guard kon PCG ang pagpangandam alang sa mahimong epekto sa bagyong Kiyapo sa Cagayan ug Batanes bisan og nakagawas na kini sa Philippine Area of Responsibility kon PAR.
Sigon ni PCG Northeastern Luzon Assistant Public Information officer Ensign Dionesio Mahilum Jr, gawas sa paghikling sa duha ka pamilyang gilangkuban sa siyam ka mga indibidwal gikan sa gibahaang mga barangay, nakapang-apod apod na sila og 500 ka mga food packs ug uban pang mga relief items gikan sa apektadong mga komunidad.
Padayon usab ang ilang monitoring sa dagan sa kadagatan, pag-secure sa mga motor banca ug pagpasilong sa usa ka natanggong nga barko sa Batanes ingon man ang hugot nga pagpatuman sa no sail policy samtang pabiling naka-blue alert ang ilang han-ay.
Samtang gipadayag usab ni Department of Social Welfare and Development kon DSWD-Cagayan Valley Regional Director Lucy Allan, mi-abot na sa 126 ka mga pamilya kon kon 396 ka mga indibidwal ang temporaryong gihikling sa sa mga lungsod sa Sta Ana, Gonzaga, Ballesteros, Lal-lo, ug uban pa tungod sa hulga nga dala sa bagyo.
Gipaniguro usab sa director nga igo ang gi-andam nilang food packs ug uban pang mg relief supplies aron matubag ang panginahanglanon sa mga lokal ga kagamhanan sa ingon masiguro ang paghatag gilayon og ayuda ngadto sa mga apektadong pamilya.
