BUTUAN CITY – Gibasol ni Senador Alan Peter Cayetano si Pangulong Ferdinand Marcos Jr sa wala madayon niyang saad nga muhatag og ₱10,000 nga ayuda ngdto sa mga kwalipikado nga benepisyaryo nga naningkamot pa nga maka-recover gikan sa COVID-19 pandemic.
Sa iyang bag-ong Facebook livestream, gibutyag sa senador nga si Pangulong Bongbong Marcos Jr. mismo ang nagpugong sa plano taliwa nga iya na kining gihingusgang mahatag niadtong tuig 2021 ngadto sa 2022 tungod sa kadaghan pa sa wala makarekober.
Apan dihang midaug na si Pangulong Bongbong Marcos, kini na mismo ang mipugong sa plano taliwa nga kada-tuig, duna’y 200 hangtud 400 bilyones pesos ang ayuda nga anaa sa budget.
Gipadayag kini ni Cayetano human gi-anunsyo sa pangulo ning mi-aging adlaw nga nga gipalapdan sa gobyerno ang United Package for Livelihoods, Industry, Food, and Transport kon UPLIFT program aron paghatag og financial assistance sa mga kabus nga na-apektuhan sa pagsaka sa presyo sa lana tungod sa gubat sa Middle East.
Gikwestyon ni Cayetano nga kini nagpasabot nga anaa gayod ang maong pundo apan gibalhin ngadto sa proyektong mahimong kawaton.
Wala’y lipod-lipod nga gipadayag ni Cayetano nga gituyo kini aron muhumot ang pangulo sa mga suko nang katawhan ilabina nga nagkaduol na ang iyang State of the Nation Address kon SONA dayong butyag nga ang klarong rason niini, mao ang intensyong kawaton gihapon ang maong pundo.
