BUTUAN CITY – Walay putol ang pagsaka sa ihap sa mga nataptan sa coronavirus disease-2019 kon COVID-19 sa rehiyon human gitaho sa Department of Health-Center for Health Development kon DOH-CHD Caraga ang 36 ka positibong kaso ug laing 2 ka patay.
Sa press briefing kagabie sa ahensya, nasuta nga sa nadawat nilang 139 ka mga RT-PCR confirmatory results gikan sa Butuan Medical Center, Northern Mindanao and Davao molecular laboratories ,103 ang nagnegatibo samtang 36 usab ang nagtest-positive sa COVID-19 virus.
Sigon ni DOH Caraga OIC Assistant Regional Director Gerna Manatad, sa 36 ka confirmed positive cases, 11 ang mga dunay close contacts sa kanhi confirmed local transmission cases, 9 ang non-medical frontliners, 7 ang dugang local transmission cases, 6 ang mga health care workers, ug 3 ang mga Locally Stranded Individuals.
Mayorya kanila anaa sa edad 20 hangtod 50 anyos diin ang pinakabata 20 anyos ug 74 anyos ang pinakatigulang samtang 22 ang mga babaye samtang 14 ang lalaki nga naggikan Agusan del Norte partikular sa Nasipit nga dunay 1 susama sa Cabadbaran City ug sa Veruela, Agusan del Sur, duha usab sa Bislig City, Urigao del SUr ug 31 sa Butuan City.
Ang mga kumpirmadong kaso sa Butuan mga residente sa Brgy. Libertad nga dunay 6, Holy Redeemer -4, Villa Kananga-4, tag-tulo sa Fort Poyohon ug Maon samtang tag-usa usab sa Ambago, Baan Km3, Baan Riverside, Bonbon, J.P. Rizal, Limaha, Maibu, Obrero, Pagatpatan, Rajah Soliman ug San Vicente.
Sa tanang bag-ong kasong nadugang sa rehiyon, 21 sa mga niini ang asymptomatic, 10 ang duna’y mild symptoms, 3 ang severe ug 2 ang critically ill kinsa mao ang gitahong namatay.
Sa pagkakaron, ang COVID-19 confirmed positive cases sa Caraga region misaka pa sa kinatibuk-ang 625 diin 369 ang nakarekober ug discharged na, 241 ang nagpaayo pa o mga active cases, ug 15 na ang namatay human ang katapusang duha nga nadugang.
Ang duha ka mga namatay gikan dinhi sa Butuan City, diin ang unang kaso usa ka 67 -aynos nga lalaki samtang ang lain, usa ka 74-nga babaye nga duna’yj pre-existing medical condition ug parehong nakasinati og COVID-19 related symptoms adtong ika-upat nga semana sa Agusto ug gidala hospital niadtong Agust 26 ug 27.
Ang unang kaso namatay pila ka oras gikan na-admit samtang ang ikaduhang kaso namatay human ang duha ka adlaw gikan sa pag-admit.
