BUTUAN CITY – Gianunsyo ni Pangulong Ferdinand Marcos Jr. ang pagkadiskubre sa Camago-3 well nga mamahimo nang kakuhaan og enerhiya sa Pilipinas.
Sa usa ka video message, gibutyag sa Pangulo nga malampuson nang na-drill ug nasulayan ang Camago-3 well nga kayang mag-produce sa hangtud 60 milyones nga standard cubic feet sa gas kada adlaw.
Kini ang ikaduhang dakong kalampusan sa ilalom sa $893 milyong Malampaya Phase 4 campaign.
Gibana-banang dunay 2.5 ka higayon nga mas daghang makuhang gas ang Camago-3 kaysa sa Malampaya East-1 discovery ug kung usahon, laumang mapatas-an pa sa kapin o kulang unom ka tuig ang operasyon sa Malampaya gas field.
Boot pasabot niini, mas daghang kuryente, mas magpadayon ang suplay ug ubos ang gastos niini alang sa mga Pilipino ilabina taliwa sa padayon nga pagtaas sa presyo sa lana hatud sa giyera sa Middle East.
Pasabot pa ni Marcos, ang Malampaya nagkantidad og dili moubos P4.80 kada kilowatt hour, kumpara sa P10.30 kada kilowatt hour sa giangkat nga LNG o sobra doble ang diperensya.
Sumala niini ang matag unit sa kuryenteng naggikan sa Malampaya bugti sa pagdaginot sa mga kabalayan, gagmay nga negosyo ug sa matag Pilipinong nagbayad og kuryente.
Target matud pa nga mahatod ang unang suplay sa gas sa ikaupat nga quarter sa 2026 ug dili pa dinhe mohunong tungod kay ang sunod nga well o balon, ang Bagong Pag-asa nga anaa sa 30 kilometros amihanan sa Malampaya ang gipahigayon na usab.
