BUTUAN CITY-Gipasabot ni Palace Press Officer Usec. Claire Castro ang hinungdan kung nganong wala nasugat ni President Ferdinand R. Marcos Jr. ang mga overseas Filipino workers (OFWs) gikan sa UAE nga ming-abot kaganihang hapon sa Villamor Air Base.
Sumala ni Castro, mingtambong ang Presidente sa meeting sa Economy and Development Council aron hisgutan ang importanteng programa sa panggamhanan, lakip na ang mga inisyatiba sa edukasyon, imprastraktura, ug ang reconstruction and development sa Greater Marawi (Stage 2), ingon man ang Unified Grand Central Project.
Dugang pa niini, nga gimando usab sa Presidente nga sa Villamor Air Base (Maharlika) ipa-agi ang mga nangabot nga mga OFW aron mapadali ang ilang immigration processing ug makauli gilyon sa ilang mga pamilya.
Tumong matud pa niini nga makuhaan ang kalisod sa mga OFW adiser makabalik sa nasud.
Samtang, luwas usab nga nakabalik sa Pilipinas ang 317 ka Pilipino nga sakay sa ika-tulo nga government-chartered flight, sumala sa Department of Migrant Workers (DMW) ug Overseas Workers Welfare Administration (OWWA).
Ming-abot ang eroplano sa Villamor Air Base sa Pasay City nga adunay sakay nga 153 ka OFWs, 114 ka dependents, ug 50 ka stranded nga pasahero kinsa napugos nga mo-uli tungod sa panagbangi sa Middle East.
Sumala sa DMW, nga parte kini sa direktiba ni President Marcos nga siguraduhon ang kaluwasan ug kaayohan sa mga Pilipino sa maong rehiyon.
Base sa natala niadtong Marso 5, kapin 1,700 ka OFWs uban sa ilang mga pamilya ang naka-uli ubos sa whole-of-government repatriation program.
