BUTUAN CITY – Napruwebahan sa Department of Agriculture nga viable diay ang pagtanom og pula nga sibuyas bombay dinhi sa dakbayan sa Butuan.
Kini human nga ang Department of Agriculture-Caraga uban sa Butuan City Agriculture Office, malampusong mi-ani sa mga red onions nga gitanom sa nataran sa Bombo Broadcast Center sa may Purok 6, Ampayon, ning siyudad.
Sigon ni Department of Agriculture kon DA-Caraga Regional Executive Director Engr. Ricardo Oñate Jr., ang pagkabuhi sa sibuyas bombay, usa ka klarong ebidensya nga kaya kining mabuhi dinhi sa Butuan.
Andam matud pa ang ilang ahensya nga suportahan ang si bisan kinsa mang gustong mananom og sibuyas bombay dinhi sa Caraga Region. Sa usa ka open field, ang Bombo Radyo duna’y duha ka mga plots sa mga techno demo sites diin gipananom ang sibuyas bombay.
Sa kasamtangan, gipang-transplant na ang mga similya sa onion bulb seedlings tungod kay andam na man usab kining itanom sa extended plot.
Samtang usa ka dakong oportunidad ang gihimong kolaborasyon sa Department of Agriculture-Caraga, uban sa lokal nga kagamhanan sa dakbayan sa Butuan ug Bombo Radyo sa pagpananom og sibuyas bombay tungod kay napakita matud pa ngadto sa katawhan ang posible ug dali ra nga pagpananom oniini dinhi sa siyudad.
Sigon ni Butuan City Agriculturist Engr. Pierre Anthony Joven, sa una nga demo sa Department of Agriculture-Caraga, makita nga class A nga sibuyas bombay ang na-produce sa duha ka mga plots sa mga techno demo sites diin kini gipananom.
Ang techno demo nag-showcase sa feasibility sa nagkada-iyang ecosystems ug nagtumbok sa pinaka-maayong management practices sa pangindahay nga matubag ang mga hagit sa pag-produce og mga local red onions sa rehiyon.
Dugang ni Joven, susamang techno demo usab ang gilusad sa managlahing lugar sa rehiyon uban sa pakig-alayon sa mga local government units.
