BUTUAN CITY – Padayon pa ang case build-up nga gihimo sa kapulisan sa Cabadbaran City lalawigan sa Agusan del Norte sa pagpusil-patay kang Gennis Tatad Guy-ab, 48-anyos, residente sa Barangay 9, sakop sa maong siyudad pasado alas-siete kagabii.
Sigon ni PCaptain Honorio Campos, tigpamaba sa Agusan del Norte Police Provincial Office, migawas sa inisyal nga report sa Cabadbaran City Police Station nga samtang nagbiyahe kini sakay sa iyang motorsiklo gikan sa Brgy. Cabinet, gitaparan kini sa riding-in-tandem suspects pag-abot sa barangay road sa Brgy. Kauswagan ug gipusil sa makadaghang higayon.
Gidala pa kini sa emergency hospital apan gideklara kining dead-on-arrival tungod sa mga igo sa bala sa iyang ulo ug li-og.
Padayon usab ang lawom nga imbestigasyon sa kapulisan sa maong siyudad aron masuta ang motibo sa kremin apil na ang responsable niini.
