BUTUA CITY – Migawas sa usa ka bag-ong pagtuon nga ang pagkaon og usa ka abokado kada adlaw, duna’y blood sugar response sa lawas, ilabina sa glycemic load nga nagpakita kung unsa ka dako ang epekto sa pagkaon diha sa blood sugar. Kung mas ubos nga glycemic load kasagaran makatabang sa paglikay sa diabetes ug mahimong makapamenos usab sa risgo sa ubang sakit.
Sa atong nasayran, ang abokado puno sa sustansya ug daghan kini og posibleng benepisyo sa panglawas ilabina sa kasing-kasing, bukog, ug sistema sa panunaw.
Migawas sa pagtuon nga ang mga partisipante gibahin sa duha ka grupo: ang usa ka grupo nagkaon og usa ka abokado kada adlaw, samtang ang usa wala’y klarong gi-usab sa ilang diet kondiin limitado lang ang ilang pagkaon og abokado.
Milungtad ang eksperimento og 6 ka bulan, kondiin ang mga partisipante mga hamtong nga adunay taas nga waistline.
Migawas sa pagtuon nga ang grupo nga nagkaon og abokado kada-adlaw adunay mas ubos nga glycemic load kumpara sa laing grupo. Bisan pareho ra ang glycemic index, ang kinatibuk-ang epekto sa blood sugar mas nanga-ayo sa grupo nga nag-abokado.
Mas daghan usab sila og fiber ug healthy fats, pero gamay ra ang animal protein ug carbohydrates sa ilang diet.
Sa kinatibuk-an, gipakita sa pagtuon nga ang regular nga pagkaon og abokado mahimong makatabang sa pagpa-ubos sa epekto sa pagkaon sa blood sugar sa lawas.
