BUTUAN CITY – Hugot nga gikondena sa Caraga Network of Evangelical Ministers and Churches ang nagkagrabeng dautang epektong hatud sa online sabong diha sa katawhan.
Sa eksklusibong pakighinabi sa Bombo Radyo Butuan, gipadayag sa network president nga si Bishop Tom Mascariñas nga naghatag kini og sayop nga paglaum sa katawhan tungod kay sa sugal, mas daghan ang pildi kaysa madag-an hinungdan nga ang uban nga mapuno na sa utang, maghunos na lang sa ilang kinabuhi.
Sigon ni Bishop Mascariñas, ang e-sabong nakadugang sa problema sa katawhan diha sa pakigbatuk sa coronavirus ug sa kalisod nga mugna sa kawala’y trabaho rason nga inay mangita lang og kwartang gamiton alang sa nag-unang panginahanglanon, mas mupasulabi na man ang pagpangita og kwartang ikapusta sa sugal hangtud nga kini magpatong-patong na nga dili na mabayran.
Gisalindot usab ni Bishop Mascariñas ang baruganan sa ubang mga local government units ang dako nga kitaon sa paghatag og permit sa e-sabong tungod kay mas dako matud pa ang mahatag niining collateral damages ngadto sa mga tawong musulod unya niini, apil na ang paghunos na sa kinabuhi sama sa gihimo sa pipila ka mga nahitabo dinhi sa Butuan.
Gidugang pa sa obispo, dili lang ang indibidwal nga milambigit sa e-sabong ang magproblema unya niini sa ngadto-ngadto kondili apil na ang ilang pamilya ug kahigalaan.
