BUTUAN CITY – Mahimo lang bililhon alang sa mga mamumuo ang pagsa-ulog sa Labor Day kung mahatag kanila ang angay nilang madawat.
Kini ang giklaro ni Butuan City ug Agusan del Norte 1st District Rep. Lawrence Lemuel Fortun sa pakighinabi sa Bombo Radyo Butuan kalabot sa mamahimong highlight sa nasangpit nga kasa-ulugan alang ning tuiga.
Gibutyag sa kongresista nga mas makatabang sa mga mamumuo ang pagbaton og executive and legislative cooperation alang sa pag-review na sa Labor Code sa nasud ilabina nga daghang mga trabahante ang apektado karon sa pag-igo sa COVID-19 pandemic.
Sigon sa kongresista, kinahanglan na matud pang repasuhon ang mga probisyon ug palisiya sa maong balaud tungod kay dako ang posibilidad nga ubay-ubay na sa mga niini ang dili na applicable sa kasamtangang panahon ilabina nga wala’y nagdahom nga mu-abot ang maong pandemya.
Samtang tungod kay problema man sa panglawas ang hinungdan nga daghan ang nawad-an og trabaho sukad mi-igo ang pandemya, gipadayag sa kongresista nga wala’y laing long-tem solution niini kondili mao gyod ang pagsugod na ug paghuman gilayon sa vaccination roll-out.
Dili matud pa malimod nga ang kadaghan sa mga negosyanteng nanira na sa ilang operasyon o kaha nanaktak og mga tawo, duna’y dakong impact sa dagan sa ekonomiya sa nasud rason nga wala’y laing makaluwas matud pa niini kondili mao ang pagbakuna na sa gi-target nga populasyon sa nasud.
