BUTUAN CITY- Malampuson nga nakumpiska ang gibana-banang P7 milyon nga smuggled cigarettes sa gipahigayong operasyon sa Police Regional Office 13 kon PRO13 kagahapon sa bunayg Mayo 7 sa may Purok 3, Baylanon, Barangay Cahayagan, Carmen, Agusan del Norte.
Sumala ni PBGEN Marcial Mariano Magistrado IV, Regional Director sa PRO13, gilunsad ang operasyon human makadawat og report ang Carmen Municipal Police Station gikan sa usa ka concerned citizen kalahot sa gi-unload nga kadudahang kargamento gikan sa pump boat vessel sa maong lugar.
Nakaplagan sa mga operatiba ang usa ka gi-abandona nga FUSO container van nga puno sa lain-laing smuggled cigarettes nga gilangkoban sa 90 ka karton sa Greenhills nga puti white, 25 ka karton sa White Cannon, ug 40 ka karton sa Red Casablanca red. Nakarekober usab ang mga awtoridad og usa ka puti nga Mitsubishi Canter truck ug usa ka puti nga KIA container van nga gituohang gigamit sa ilegal nga transportasyon.
Sa kasamtangan, padayon karon ang imbestigasyon ug koordinasyon sa mga ahensya sa gobyerno aron mailhan ug madakpan ang mga responsable sa maong kalihukan.
