-- ADVERTISEMENT --

BUTUAN CITY – Gisugdan na kaganinang buntag sa lokal nga kagamhanan ning siyudad sa Butuan ang house-to-house payout sa tag-5-mil pesos ngadto sa mga benepisyaryo sa Social Amelioration Program kon SAP sa nasudnong kagamhanan.

Pinaagi sa mga personahe sa City Social Welfare and Development kon CSWD, gisugdan kini ngadto sa na-identify na nga mga benepisyaryo sa Brgy. Villa Kananga.

Gituyo ang house-to-house pay out aron dili magtapok kon ma-obserba ang social distancing nga maoy pinaka-epektibong paagi aron malikayan ang pagkaylap sa corona virus disease 2019 kon COVID-19.

Una nang gibutyag ni Mayor Ronnie Vicente Lagnada sa eksklusibong pakighinabi sa Bombo Radyo Butuan nga dili tanang households sa 86 ka mga barangay ning siyudad ang makadawat sa nasangpit nga pundo.

Kini ang hinungdan nga kadtong dili makadawat sa nasangpit nga kantidad maoy hatagan nila sa mga mga food packs nga duha ka semana na nilang gi-andam.

-- ADVERTISEMENT --

Gibutyag pa sa mayor nga higayong duna na usa’y ihatag nga pundo ang nasudnong kagamhanan, ila gihapon kining ihatag ngadto sa mga hingtungdan nga kansa sundan usab nila pagpanghatag og food packs.

Subay sa kahasol nga hatud sa gipatuman karong enhanced community quarantine, mihangyo si Mayor Lagnada ngadto sa tanan nga antuson ang kasamtangang sitwasyon tungod kay apektado man niini ang tanan ug dili lang ang pipila.

Kinahanglan matud pang sabton sa tanan tungod kay pag-amping kini alang sa atong kaayuhan aron dili matud pa kita masusama sa ubang mga dapit nga duna na’y daghang nataptan og nakalas.