BUTUAN CITY – Gibana-banang mukabat sa 300-mil pisos ang inisyal nga damyos sa na-abo nga walo ka mga balay sa Purok 5-C, Ube, Barangay Maon ning syudad sa Butuan.
Sa eksklusibong pakighinabi sa Bombo Radyo Butuan, gibutyag ni FO3 Ben Sergio Palletero, arson investigator sa Bureau of Fire Protection kon BFP-Butuan, pasado alas-8:54 matud pa kagabii sila nakadawat og fire call gikan kang Lovelyn Rosales kansa dali nilang girespondihan gamit ang duha nila ka mga fire trucks.
Migawas sa ilang inisyal nga imbestigasyon nga naggikan ang kalayo sa usa sa mga kwartong gipa-abangan ni Vergie Ranan. Sa ila matud pang pag-abot, unom ka mga balay na ang nasunog nga gama sa mga light materials.
Mi-abot sa 14 ka mga pamilya kon 37 ka mga indibidwal ang apektado sa pagkasunog sa walo ka mga balay sa Purok 5-C, Ube, Barangay Maon ning syudad sa Butuan kagabii.
Gibutyag ni Brgy. Maon Kapitan Bob Vicente nga kagabii pa lang, ila nang gisiguro nga wala’y ma-angol sa maong hitabo nga maoy iyang gipasalamatan.
Apil matud pa sa mga .nasunugan sila kanhi Kagawad Vicente Rosales anaa pa kang Maxis Rosales, Marvin Rosales, Miro Abapo, Jeremy Arellano, Jedever Sinahon, Jose Arellano ug Virgie Ranan nga duna’y unom ka mga boarders.
Pipila matud pa sa mga nasunugan nanguli sa ilang pinuy-anan sa Brgy. San Vicente, Villa Kananga ug sa ilang kabanay diha sa ila rang barangay sa Maon.
Gipasalig usab sa kapitan nga duna’y madawat nga 12-mil pisos nga cash assistance ang tag-iya sa mga balay nga nasunugan gikan sa city government.
Samtang sa panig sa mga boarders, gipadayag ni Kapitan Vicente nga mag-agad na lang sila sa mahimong desisyon sa City Social Welfare and Development kon CSWD.
