BUTUAN CITY- Gipangunahan ni Agusan del Norte Governor Maria Angelica Rosedelle Amante sa pakigtambayayong nila office in Charge-Provincial Agriculturist Benjie Villaruben, Provincial Board of Member Erwin Dano, Department of Agriculture -Caraga Regional Director Engr. Ricardo Oñate, Bureau of Fisheries and Aquatic Resources-Caraga, Division Chief Manolito Casapao sa Philippine Coconut Authority-Agusan del Norte ug Department of Trade and Insudtry Provincial Director Lorijane Sacote.
Agig pagpasidungog sa dakong kontribusyon sa mga mag-uuma ug mangingisda sa pagpalig-on sa food security ug ekonomiya sa probinsya, nagpahigayon ang lokal nga panggamhanan sa Agusan del Norte pinaagi sa Provincial Agriculture Office (PAO) og Farmers and Fisherfolk Day kagahapong adlawa Mayo 20, 2026 sa Capitol Covered Court, Butuan City. Isip kabahin sa selebrasyon, gipang-apod-apod ang mokabat sa P29.8 milyon nga livelihood assistance ug mga proyekto alang sa 15 ka asosasyon sa sektor sa agrikultura ug pangisdaan, uban sa suporta sa mga national line agencies.
Lakip sa mga proyekto nga gihatag mao ang drying facility, greenhouse facility, hauling truck, fishery support pinaagi sa “Payao,” suporta sa tilapia ug milkfish production, abaca warehouse, coconut oil processing building, ug uban pang agricultural input assistance. Ang maong inisyatiba nagpamatuod sa padayon nga suporta sa lokal nga panggamhanan alang sa kalamboan ug lig-on nga panginabuhian sa mga mag-uuma ug mangingisda sa probinsya.
