BUTUAN CITY – Gipanghimakak ni Ka Diwa Habagat, nagpa-ilang tigpamaba sa New People’s Army kon NPA-Agusan del Norte ang gika-ingong membro matud pa sa ilang walhong kalihukan ang nadakpang si Mamerto Salahay kinsa nakuhaan sa iyang posisyon og mga war materials.
Sa eksklusibong pakighinabi sa Bombo Radyo Butuan, gipadayag niining wala sila’y membro nga ingon niini ang pangalan ug wala usab matud pa sila’y gi-contact nga indibidwal aron magkarga sa maong mga gamit padulong ning siyudad.
Angayan matud pang sutaon kini og maayo sa mga mediamen tungod kay wala man gipa-interview kaganina sa mga pulis ang suspek didto sa crime scene ug dali pang gipasulod sa ilang patrol car.
Angayan usab matud pang dumduman sa tanan nga gipakusgan karon sa kagamhanan ang ilang kampanya alang sa pagtapos na sa insurhensiya pinaagi sa National Task Force to End Local Communist Armed Conflict kon NTF-ELCAC.
Posible matud pang kabahin kini sa aktibong showcase sa kagamhanan aron lang mulampos ang ilang kampanya bahala og ma-ipit ang mga tawo kansa dili matud pa angayang himuon.
