BUTUAN CITY – Hugtanong gipatuman sa Philippine Coast Guard ang ‘No Sail’ policy sa kadagatan sa Cagayan Valley ug kasikbit nga mga lugar samtang padayong gipangandaman ang posibleng epekto sa tropical depression Kiyapo.
Sigon ni Coast Guard District Northeastern Luzon assistant public information officer Ensign Dionesio Mahilum Jr, cover sa maong palisiya ang Batanes, Kalayaan ug Santa Ana sa Cagayan ingon man ang Divilacan sa Isabela ug ang lalawigan sa Aurora.
Tumong niini nga malikayan ang bisan unsa mang dili maayong insidente sa kadagatan ilabina nga gila-umang dako ang mahimong epekto sa maong daut nga panahon.
Sa pinaka-ulahing monitoring sa Philippine Coast Guard, wala pa’y natalang stranded nga mga pasahero tungod kay sayo nilang gipatuman ang travel ban.
Duna na’y lima ka mga sakayang pandagat ug 18 ka mga motor banca ang nagtago sa mga luwas nga baybayon.
Padayon usab silang nanawagan sa mga mananagat ug mga residenteng nagpuyo daplin sa baybay nga sundon ang no sail policy ug maminaw sa opisyal nga abiso sa mga otoridad aron masiguro ang ilang kaluwasan samtang nagpabilin ang hulga sa maong bagyo.
