BUTUAN CITY – Gipaniguro sa National Grid Corporation of the Philippines kon NGCP-Caraga nga wala’y masinatiang problema sa supply sa kuryente ang entiro rehiyon karong Mayo 9 nga eleksyon.
Kini human nagmalampuson ang clearing operation nga ilang gihimo sa 60 ka mga tinuyo nga gitanom nga kahoy’ng Falcatta ubos sa ilang transmission line sa Jasaan-Butuan 138,000 KV line.
Sa eksklusibong pakighinabi sa Bombo Radyo Butuan, gipadayag ni NGCP-Caraga information officer Chris Abellanosa nga adiser nila gisugdan ang operasyon, nakigsulti pa silang daan sa tag-iya sa maong luna kinsa nagmagahi kaniadto nga putlon ang nasangpit nga mga punuan sa Falcatta.
Dinhi matud pa gipadayag sa maong land owner ang iyang mga pagmahay ug aligutgot nga sa ilang lantaw, duna usa’y balidong rason.
Mi-abot sa punto nga misugot ra matud pa ang maong tag-iya sa yuta nga pamutlon ang nasangpit nga mga kahoy sa rasong dili siya gustong mao unya kini ang mahimong hinungdan nga mawad-an og sugang dagitabnon ang Caraga Region.
Nakasabot matud pa ang maong tag-iya nga ang pagpatuman nila sa operasyon, base na sa kamanduan sa Department of Energy-Central Office subay na usab sa pagpangandam alang sa nagsingabot na nga local ug national elections.
Padayon pa usab nga gi-evaluate sa taga-Department of Environment and Natural Resources kon DENR ang kantidad ngadto sa tag-iya sa maong luna base na usab sa taripa sa gobyerno kansa kaniadto wala uyuni sa maong indibidwal apan dihang napasabot na og maayo, iya kining gisanong.
