BUTAUN CITY- Gipadayag ni Atty. Race Del Rosario nga adunay legal nga basihan ang posibleng pagsikop sa National Bureau of Investigation (NBI) kang Senador Ronald “Bato” Dela Rosa may kalabotan sa giingong imbestigasyon sa International Criminal Court o ICC batok sa Crime Against Humanity. Sumala ni Del Rosario, ang Republic Act 9851 o ang Philippine Act on Crimes Against International Humanitarian Law, Genocide, ug Other Crimes Against Humanity maoy naghatag og legal nga pundasyon sa Pilipinas aron makigtambayayong sa international courts ug tribunals sa mga kaso nga may kalabotan sa international crimes.
Gipasabot usab niini, nga bisan pa man nga mingbuwag na ang Pilipinas sa Rome Statute, nagpabilin gihapong epektibo ang lokal nga balaod kasna nagtugot sa gobyerno sa paghatag og kooperasyon sa ICC kung adunay padayon nga imbestigasyon o standing warrant of arrest batok sa usa ka personalidad. Sumala pa ni Del Rosario, nga klaro sa probisyon sa RA 9851 nga dilin pwedeng baliwala-on sa gobyerno sa Pilipinas ang kaugalingong imbestigasyon ug tugotan nga mopadayon ang proseso sa international tribunal.
Dugang pa niini, adunay kapilian ang administrasyon sa pagturn-over o pag-extradite sa usa ka indibidwal nga gipangita sa ICC, lakip na matud pa niini si Senador Dela Rosa kon adunay opisyal nga warrant nga ipagawas batok kaniya. Bisan pa sa nagkalainlaing opinyon kalabot sa legalidad sa ICC warrant human sa pag-atras sa Pilipinas sa Rome Statute, sigon sa abogado nga dili mahimong pasagdan ang RA 9851 tungod kay kini usa ka lokal nga balaod ug adunay bug-at nga legal nga epekto. Apan pag-klaro pa sa abogado, nga nakadepende gihapon sa desisyon ug prerogatibo sa administrasyon ni President Ferdinand Marcos Jr. kon ipadala si Senador Dela Rosa ngadto sa hurisdiksyon sa ICC.
