BUTUAN CITY – Gikadismaya sa nabiilanggong top Leader sa New people’s Army kon NPA ang gipahigayong Oplan Galugad sa Agusan Del Norte Provincial Jail diin nakuha pag-apil ang iyang transistor radio.
Sumala pa ni Ricardo Manili alyas Ka Joker sa pakighinabi ning sibyahan, ang radyo lang ang iyang bugtong kalingawan aron makapaminaw sa mga balita sa Bombo Radyo apan gikumpiska kini atol sa Oplan Galugad diin nahimung sentro ang iyang selda tungod sa balitang pag-rescue sa maong kumunistang lider.
Pagbutyag pa ni Ka Joker, kanunay siyang nagsunod sa mga balita sa Bombo Radyo ilabina hinungdang mihangyu kini sa kadumalahan sa jail nga tugutan siyang makabaton ug radyo, nga gihatag usab kaniya.
Apan wala niya damha nga kagahapong adlawa, apilon kini sa pagkumpiska.
Samtang gikataw-an lang ni Ka Joker ang nadawat matud pa sa otoridad nga impormasyung pag-rescue kaniya. Sigon sa piniriso, sa kadugayon niya sa kalihukan nahibalo siya sa pagdula-dula sa giyera ug nasuta niini nga hugot ang seguridad sa iyang nahimutangan tungod sa headquarters sa kapulisan ug mga police station.
Daw sama sa nagtubok matud pa ang iyang mga kaubanan kung mosulay kini sa pagrescue kaniya gawas pa sa iyang gipamating sakit sa kalawasan.
Mas luwas matud pa siya karun nga anaa sa prisuhan ilabina kay gideklara na usab ang all out war sa kasundaluhan batuk kanila.
Nasayrang nadakpan si Ka Joker sa niaging tuig sa usa ka checkpoint sa Barangay Remedios, Esperanza, Agusan del Sur sa hiniusang puwersa sa militar ug kapulisan. (Rolan Janea)
