BUTUAN CITY- Mopasaka og petisyon ang Nagkaisa Labor Coalition sa Regional Trial Court kon RTC Pasig Branch 152 aron supakon ang temporary restraining order kon TRO nga nagpahunong sa implementasyon sa P60 nga wage increase sa National Capital Region (NCR).
Sumala ni Nagkaisa Labor Coalition Chairman Atty. Sonny Matula, wala’y hurisdiksyon ang RTC sa pag-isyu sa TRO batok sa Wage Order No. 27 sa Regional Tripartite Wages and Productivity Board kon RTWPB, tungod gidili kini ubos sa Article 126 sa Labor Code, nga nagdili sa bisan unsang korte sa paghatag og injunction o TRO batok sa mga proceedings sa komisyon o regional wage board.
Gipasabot usab ni Matula nga ang mga kompanyang misupak sa wage order kinahanglang mo-agi sa administratibong proseso sa pag-apela sulod sa 10 ka adlaw gikan sa pagmantala sa order, imbes nga modangop diretso sa korte.
Busa, naglaum ang labor coalition nga mabalik ang P60 nga umento sa sweldo nga ilang giingong dili angay nga napahunong.
