BUTUAN CITY – Gisuspende sa mayor sa San Francisco, Agusan del Sur ang duha nila ka mga traffic enforcers nga nag-viral human nakuhaan og hulagway nga nag-angkas sa usa lang ka motorsiklo.
Sa gipagawas nga suspension order ni Mayor Solomon Rufila kaganina, nakalatid nga nakahimo og seryusong kalapasan sa rules and regulations ang maong mga traffic enforcers kondiin hugot nga gidili ang backriding karong panahon pa gihapon sa COVID-19 pandemic.
Mu-epekto ang ilang 15 ka adlaw nga suspensyon sa trabaho nga wala’y sweldo sugod karong adlawa ug mubalik sila sa trabaho sa Hunyo 25 na, adlaw’ng Huwebes.
Nakalatid sa Memorandum Order No. 6-11 series of 2020 nga gipirmahan usab ni municipal administrator Barry Maurice Montilla, nga dili i-tolerate sa lokal nga kagamhanan sa San Francisco ang ingon niini nga kalapasan ilabina nga mga traffic enforcers pa sila nga mao unta’y angayang himuong modelo sa uban.
Mala-umon ang San Francisco-LGU nga unta himuon kining panig-ingnan sa tanan nga seryuso ang kagamhanan sa pagpatuman sa ‘no back-ride’ policy aron makab-ot ang tinguha sa Inter-Agency Task Force for the Management of the Emergence of Infectious Diseases nga mapugngan ang pagkaylap sa makamatay nga COVID-19.
