BUTUAN CITY – Init gihapon nga hisgutan sa kalibutan sa pageantry ang kanunay nga pagsulod sa Pilipinas sa mga dagkong pageant competitions bisan na sa mga lalaki rason nga dakong hagit alang kang Mister Universe Philippines 2026 Andrei Clark Sabanal, ang pagsulod niya sa international stage.
Nasayrang human siya makoronahan isip Mister Bataan 2026, paspas siyang misikat ug karon andam na siya alang sa Mister Universe 2026 nga himoon sa Universal Studios Hollywood gikan Septembre 20 hangtod 27 ning tuiga. Sa pakighinabi sa Bombo Radyo Philippines, gibutyag ni Andrei nga naka-focus siya sa iyang adbokasiya alang sa kabatan-onan ug panglawas nga iyang ipa-ila sa internasyonal nga lebel.
Sa pagkakaron, hugot ang iyang pagpangandam apil na niini ang training, public speaking, ug fashion styling aron masiguro nga mobida siya sa international stage.
Kusog usab ang suporta sa mga Pilipinong fans ug daghan ang naglaom nga makasulod siya sa top rankings sa kompetisyon ug makuha ang korona.
Kung mulampos siya, usa na usab kini ka dakong dungog alang sa Pilipinas sa natad sa male pageantry. Sa finals sa Hollywood, makigsangka si Andrei batok sa mga delegado gikan sa nagkalain-laing nasod, ug gilauman nga mahimong usa sa mga highlights sa maong kalihokan ang iyang performance.
