BUTUAN CITY- Nagpatuman ang National Grid Corporation of the Philippines kon NGCP og Yellow Alert sa Mindanao Grid karung adlawa Agosto 12, gikan ala-1 sa hapon hangtod alas-8 sa gabii, tungod sa pagkunhod sa available power capacity ug pagtaas sa konsumo sa kuryente.
Sumala ni Kristoffer Abellanosa, NGCP Caraga Spokesperson, adunay 9 ka power generation plants nga naka-force outage, samtang ang ubang planta nag-operate sa derated capacity, hinungdan nga mokabat sa 621.6 megawatts ang unavailable capacity sa grid.
Lakip sa nakaapekto mao ang maintenance outage sa JNPK Power Plant Unit 2 sukad Hulyo 28 ug ang emergency shutdown sa JNPK Power Plant Unit 1 niadtong Agosto 9 tungod sa technical problem sa boiler tube.
Gipasabot usab ni Abellanosa, nga ang Yellow Alert dili awtomatikong nagpasabot nga adunay brownout, kondili nagtimaan kini nga kulang ang operational margin sa grid aron matubag ang gikinahanglang contingency reserves, ilabina samtang taas ang forecasted demand.
Busa, giawhag ang publiko nga magmatngon ug mahimong responsable sa paggamit sa elektrisidad, ilabina sa mga oras nga peak ang konsumo, aron malikayan ang dugang pressure sa Mindanao Grid.
