BUTUAN CITY – Duna na’y dakong kala-inan ang mga magprotesta diha sa kadalanan sa ingon niini nga adlaw, Labor Day kumpara niadtong mi-aging katu-igan.
Gibutyag ni JC Solomon, ang tigpamaba sa National Intelligence Coordinating Agency kon NICA-Caraga subay sa mga lihok-protestang gilusad sa mga progresibong grupo sa ubang lugar sa nasud atol ning Adlaw sa Pamuo kon Labor Day.
Sa eksklusibong pakighinabi sa Bombo Radyo Butuan, gibutyag sa opisyal nga kini tungod kay milihok gayod ang gobyerno ilabina sa panahon ni kanhi Pangulong Rodrigo Duterte pinaagi sa gimugnang NTF-ELCAC kon National Task Force to End Local Communist Armed Conflict.
Ilalom matud pa sa maong task force, mas gipakusgan ang paningkamot sa gobyerno nga mapa-abot ang tinud-anay niining tinguha nga hatagan og bag-ong kinabuhi ang nanurender nga mga rebeldeng New People’s Army kon NPA uban sa ilang mga mass supporters.
Gawas pa kini sa pagpasaka usab og kaso niadtong mga masutang milambigit sa mga kalihukan aron puhagon ang gobyerno ug pagpadayon sa military operations.
Samtang gibutyag usab sa kanhi rebel leader nga si Ka Boom nga ang mga nagprotesta karon ilabina sa kauluhang Manila, igo lang nanukot sa saad kaniadto ni Pangulong Ferdinand Marcos Jr., dihang nangampanya pa siya.
