BUTUAN CITY – Gipanganlan na ni Department of Interior and Local Government kon DILG Secretary Benjamin Abalos Jr. ang 11 ka mga tag-as nga opisyal sa Philippine National Police kon PNP nga duna’y kalambigitan sa 990-kilos nga shabu raid niadtong Oktubre ning mi-aging tuig nga nagkantidad og 6.7-bilyunes pesos nga miresulta sa pagka-aresto ni Police Master Sergeant Rodolfo Mayo Jr., miyembro sa PNP-Drug Enforcement Group.
Kini gilangkuban sa kanhi top 3 sa PNP nga sila kanhi Deputy Chief PNP for Operations PLTGen Benjamin Santos Jr.; kanhi Director sa PNP Drug Enforcement Group kon PDEG Police Brigadier General Narciso Domingo ug kanhi hepe sa PDEG Special Operations Unit sa Region 4-A Police Colonel Julian Olonan.
Anaa usab sila Police Captain Jonathan Sosongco, hepe sa PDEG special operations unit 4-A arresting team; PLTCOL Arnulfo Ibañez, OIC sa PDEG special operations unit NCR; Police Major Michael Angelo Salmingo, deputy sa PDEG special operations unit NCR; PLCol. Glenn Gonzales sa Quezon City Police District; PLt Ashrap Amerol, Intelligence officer sa PDEG intelligence and foreign liaison division; PLCol. Harry Lorenzo, station commander sa Manila PD Moriones ug PCapt Randolph Piñon, ang hepe sa PDEG SOU 4-A intelligence section.
Kagahapon gipresenta mismo ni Abalos ang mga closed-circuit television o CCTV footage nga nakuhaan niadtong adlaw sa pagka-aresto kang Mayo kondiin makita ang pipila ka mga PNP officials sa maong lugar.
Sa maong video, nadiskubre ang panakunsabuhay ug pagsulay pagtabon ni Mayo wala siya malipay sa report sa PNP sa maong operasyon tungod kay lahi matud pa ang nahitabo kumpara sa na-file nga mga dokumento ug mga testimoniyang gihatag sa nalambigit nga mga police officers rason nga ngmugna og advisory board ang National Police Commission nga maoy mitutok sa nasangpit nga imbestigasyon.
Sigon ni Abalos, duna’y 42 ka mga police officers ang nagkuha og 42 kilos gikan sa 990-kilos nga nakumpiskang shabu gikan sa pag-atiman ni Mayo kansa narekober ra usab sa mga otoridad sa usa ka abandonadong sakyanang naka-park sa Boni Serrano Ave. sa San Juan City, duol sa Camp Crame.
