BUTUAN CITY – Wala’y na-angol sa gibana-banang kapin 30 ka mga pasahero sa bus unit sa Bachelor Express Incorporated kon BEI human kini gilatayan sa kalayo . kaganinang buntag.
Sigon ni Police Staff Sergeant Junvic Guzon sa eksklusibong pakighinabi sa Bombo Radyo, gikan matud pa sa lungsod sa La Paz, Agusan del Sur ang nasangpit nga bus ug padulong unta dinhi sa dakbayan sa Butuan apan pag-abot niini sa Purok 4, Brgy. Poblacion sa Bayugan City, lalawigan sa Agusan del Sur, kalit lang kining mi-aso rason nga daling gipakanaog sa driver ang mga sakay niining pasahero.
Migawas matud pa sa inisyal nga pakisusi sa Bureau of Fire Protection kon BFP-Bayugan nga naggikan ang kalayo sa mi-spark nga wiring sa makina sa bus kansa duol ra sa gas hinungdan sa paspas nga pag-ulbo sa kalayo.
Aksidente lang matud pa ang nahitabo human nakita sa driver nga grabe ang pag-aso sa makina nga parte sa sakyanan.
